Thinlung A Su Taktakmi Kutdok (Beggar) Putar Pa Fanu Te Caciah Lio

Ngakchia ahhin a tam deuh cu, sianginn kai lo ni Zarhte ni le Zarhpi ni (weekend) hna caan ah khin an nule an pa hna sinah leng chuahah an kal tawn hna, asiloah an hawile hna he lente an icelh ti tawn hna.

Sihmanhsehlaw, Ji Honghong timi ngakchia nute tu cu Zahte le Zarhpi ni caan a hman tawn theu ning cu aa dang ngaingai. Amah hringtu a pa cu misifak a si caah lam kamah kutdok rian a tuan tawnmi a si i, a pa sinah cun sianginn khar caan poah ah a caan a van hmang tawn.

Kum 6 te lawng a si rihmi Ji Honghong ngakchia nute cu ca ciah/ca zoh a zuam taktak mi a si. Ca ciah/ca zohnak hmun hmanh ngei thitha loin a pa kutdok rian a tuannak pawngte ahcun khua a sik taktakmi le thlitu lakah puan ikhuh buin a cawnmi ca cu a ciah tawn.

Chaklei Tuluk ram, Shandong peng i a ummi Yimeng lam le Hongqi lam aa tonnak hmunah mah bantukin mi thinlung a su taktakmi kutdok rian a tuanmi a pa pawngte ah ngakchia nute caciah lio te cu hman an va thlak tiah Daily Online thawnglatu pawl hna nih an langhter.

Mah cuka hmun cu a kih tahnak Celsius degree 10 tiang a tumnak hmun a si i, Ji nhakchia nute a pawngah cun ke in mitlungkal mi pawl hna phaisa halnak khengkur pahnih cu a um.

Yiming Zanlei thawngthanhnak nih; Ji ngakchia nute cu Linshu khuapi i a ummi Nanzhuang Primary School (Taangli tang sianginn) ah pakhatnak (first grade) a hmumi nute a si tiah an ti.

Ji ngakchia nute nih thawnglatu pawl sinah a chimmi bia cu Zarhte le Zarhpi ni (weekend) caan hi ka hua tuk ee tiah a ti, zeica’h ti ahcun lamkam i a pa sinah kutdok rian va tuan kha a duh lo caah a si.

Ngakchia nute nih cun ingsa (homework) vialte cu ka sayamah nu he kan tuah dih cang nain ka pa nih tuluk cafang fonh cu catlap 5 lengmang a ka tialter than tawn. Kan sayamah nu nih a kan chimh rih lomi ca pawl hna zong tha tein kan thiam ko hna a ti.

Ji ngakchia nute nih cun ca cawn hi a duh tukmi phun a si i, kutdok a simi rian kan tuannak nih hin ka ca ciahnak cu a ka kham kho hlei lai lo tiah a ti chap.

Wang Jiuchang, Ji i a pa nih cun kan nupi hi thluak thatlo zawnak in a zawmi a si, ka fapa upa deuh zong sianginn kai liomi a si pinah kum 80 a simi ka nu hna zong cawmken a hauh caah mah bantukin kutdok rian ka tuan ko lo ahcun tuan ding dang ka ngei lo tiah a ti.