James: Malaysia Vuanci Pakhat Kan Ton, Chin Ralzam Kong Le MyRC Card Kong Biaruahnak Kan Ngei Kho

Malaysia, Chin ralzam communitee bu chungin kan i bochan ngaimi le ACR (Alliance of Chin Refugee) ah coordinator rian an kan tuanpiaktu James Bawi Thang Bik nih Port Klang vuanci pa an tonnak kong cu Chin Modern Express – News sinah hitihin a langhter.

Tuni (Jan 14), zanlei suimilam 5pm in 6:30 Pm tiang, keimah le Tuluk miphun ka hawile pathum hna he tiin Port Klang vuanci YB Charles Santiago cu 2019 hnu Chin ralzam um/tthuttoning kong le MyRC card kong biahalnak kan ngei kho tiah a ti.

Ka hawile minung 3 hna cu: 1. Refugee for Refugee (NGO) in an Founder, 2. Methodist Church Pastor, le 3. Scripture Union Peninsula in minung pakhat tiin an si hna.

2019 hnu ah Chin ralzam, Malaysia ramchung um khawhnak kong kan halmi ah vuanci nih a kan lehmi cu keimah nihcun kan tanpi tuk ko hna, Chin ralzam nan dirhmun hi kan theihthiam tuk ko hna tiah a kan ti.

A si nain, keimah lawng tuah khawhmi a si lo caah Chin Ralzam tampi nan umnak hmun KL chung, Bukit Bintang Vuanci hna khi va tong ve hna ulaw a tha lai tiah ruahnak a kan cheuh ve.

Cun vuanci dang pawl nan ton hna tikah atu bantukin Tuluk Khrihfabu Pastor hna he nan ton hna ahcun hmual a ngei deuh lai, cun nan ton khawh hna lo ahcun rak ka chim te ulaw, ton khawhnak lam kan bawmh ve hna lai tiah a kan ti.

Cun atu lio, kawlram ah a cang cuahmahmi AA hriamtlai le ralkap an ikahnak kong zong hi tampi in chim hna uh tiah ruahnak a kan cheuh chap.

Port Klang vuanci YB Charles Santiago hi a hlan ahcun nuhrin covo rian biatak tein a rak tuan balmi a si.

MyRC card kongah kan halmi cu mahtihin a kan leh, MyRC card (phaisa dih in) nan i tuahmi cu cozah nih phungning tein ramchung um khawhnak ding caah cohlan piak ding cu a har ngaingai.

Malaysia cozah nihcun ralzam minung pazeizat dah nan um ti le, phungning loin a ummi ramdangmi minung zeizat dah an si ti cu theih kan duh pengmi a si.

Kan nih nihcun ralzam nan sinak dihlak bio-metric data tiangin inlak dih hna hmanh kan in duh ko hna, man pek hau loin. MyRC company nih phaisa an inlakmi hna cu ka khuaruah an har ko tiah a ti.

Kannih nih kan let ve mi cu, Richard Towle nih MyRC card tuah hi tha a rak kan pek, i tuah ulaw a tha ko, cozah nih lam an insialpiakmi hna a si tiah pei an kan ti cu tiah kan chimh.

Vuanci Charles nih a kan lehmi cu, ziah Richard Towle nihcun mahcuticun an ti hna hnga, a luan ciami kum 2 lio zongah kan i tong bal ko. Cun cozah nih MyRC card kan lungtlinpi lonak kong zong tha tein kan chimh bal ko tung tiah khuaruahhar ngaiin a kan leh ve.

Refugee No More timi tlangtar in Oct 27, 2018 ah  (A Pennal Discussion) biaruahnak rak tuahmi ah MyRC card cu cozah nih ralzam caah thiltha an tuahmi pakhat a si tiah Richard Towle nih  a rak chim. MyRC card cu phungning in um khawhnak ding caah san a tlaih lonak kong a rak theih ko nain a chim tinak a si.

Cucaah cozah lei hoih incun MyRC card cu phungning tein ramchung um khawhnak ding caah cun santlaihnak ngeih dawhdang a si ti lo.

A si nain, 2019 hnu Malaysia um Chin ralzam kongah Port Klang vuanci YB Charles Santiago ruahnak cheuh bangin in pehzulh i Bukit Bintang vuanci zong ton khawh dingin timhtuahnak kan ngei tiah ACR Coordinator James Bawi Thang Bik nih a chim.