Fanute A Si Ruangah Hringtu Nulepa Nih Hnawmpung Chungah An Hlonh, Hngerhte Nih Khatthupin An Rak Tlanh

Hnawmpung chungah plastic in an tuam i an hlonhmi ngakchia chuakka nute cu hngerhte nih khatthupin an rak tlanh nain a nunnak tu cu an khamh khawh than.

Central Indian, Madhya Pradesh peng um Bhopal palik nih ngakchia chuakka fanute cu hringtu nulepa nih fapa a si lo caah an hlonhmi a si tiah an chim.

Hnawmpung chungah hlonhmi ngakchia chuakka fanute cu lakphak dawr a ngeimi Dheeraj Rathore nih Zarhteni zingka te i lam a kal lioah ngakchia tah thawng a theih hnu in a van tuamhlawm hi a si.

Dheeraj Rathore nihcun ngakchia chuakka nute cu hnawmtam lakah cun a lu le a takpum khat tein hngerhte nih an rak tlanh tiah a ti. Cun a hawile minung 2 a kawh hna i ngakchia chuakka nute takpum tlanhtu hngerhte le thakza pawl hna cu an thianh piak.

Cu hnu ah, ngakchia chuakka nute cu tha tein a tuam i siin an ah kalpi. Ngakchia te cu a rihzaan 3.5lbs lawng a si. Ngakchia chuakka poah cu an rihzaan 5.5lbs in 8.8lbs karlak tal cu punghman in an si awk a si tiah siin riantuantu hna nih an langhter.

Ngakchia chuakka fanute cu siin an rak kalpi lioah khan a takpum ah hliamhma i ruunnak tete hna zong tampi a um chih tiah an chim chap. Cucaah palik nih ngakchia chhuakka fanute hlonhtu a simi hringtu nulepa hna cu tlaih dingin an kawl hna.

India ram hmun zeimawzat ahcun mah bantukin fanu nakin fapa duh deuhnak le thleidannak hi a tam ngai. Nulepa zeimawzat hna nih fanu an duh deuh lonak hna cu, an phungah fanu hna cu pasal an ngeih tikah anmah tu nih an pasalle kha chaw man (dowry) an manh hna.

Cun pasal an ngeih hnu ahcun an chungkhar nulepa hna cu an chuahtak hna i nulepa an zohkhenh ti hna lo caah fanule cu santlaihnak an ngei lo tiin fanu hrin an duh lo deuhnak hna hi a si.

Mail Online