Biadik Phuangtu Palik Bawi Hlun, Moe Yan Niang Thonginn In A Chuak Chuak Cang

Palik bawi hlun a rak tuanmi Moe Yan Niang cu Reuters thawnglatu minung 2 kongah biadik interview in a rak chim ruangah palik phung section 16 (b) 22 ah a ummi phungbuar nakin 2017, December 12 ahkhan an rak tlaih i thong an rak thlak.

Cun taza an cuai hnu ah 2018, April 22 ahkhan dantatnak kum 1 thongthlak le rianhrang tuan dingin biakhiahnak an rak pek. Cun palik bawi (Duh-Ye-Hmu) sinak a reng zongin an rak thlak.

A si nain, tuzing (February 1) ah thonginn an khumhnak Insien Thonginn in luatnak a hun hmu than cang. Thonginn a chuahpah i biahalnak an tuahmi ah a chimmi cu palik rian ka tuan chung vialte ah palik phung ka buarmi zeihmanh a um lo tiah a ti.

Democracy hruainak lam ah kar a hlangmi ram kan si cang bantukin palik nih kan ngeihmi phung hna hi phung fialfai an si lo, palik riantuantu a simi caah harnak petu men an si. Cucaah kei nihcun remh hau ah ka ruah hna tiah a chimchap.

Rakhine ram buainak kongah Reuters thawnglatu minung 2 an rak tlaih hna ahkhan palik bawi hlun Moe Yan Niang nih mah thawngla pahnih hna hi palhnak an ngei lo, palik nih tlaih ding hrim in rap an chiahhnawhmi hna an si. Mah cu rap tarnak hmanh ahcun palik bawizik (Ye-hmu-choh) Tin Ko Ko nih a hruaimi hna an si tiah biadik a rak chim.

Palik bawi hlun Moe Yan Niang cu biadik phungtu miding mifel a si tiah ramkhel rian ruangah thongthlak a tongmi hna bawmchantubu U Win Tin foundation nih upatnak an rak pek pinah Pen Myanmar timi bu zong nih chim, rel le tial khawhnak phung a dirpitu le a hmangtu a si tiah 2018, December 22 ah upatnak laksawng zong an rak pek.

Mizzima