Kylie Jenner Nih Vawlei Cung Kumno Bik Billionaire Sinak Tuanbia Thar A Tial

Vawlei cung minthang bik ah aa telmi muidawh le tungtai ttha Kylie Jenner cu vawlei cung billionaire aa chuahmi vialte lakah ngakchia bik a si tiah Forbes magazine nih Cawnnihnih ni (4 March) ah vawlei pumpi theih in a vun thanh.

Kylie Jenner cu August 10, 1997 ah a chuahmi a si caah kum 21 lawng a si rih. Cucaah vawlei cung billionaire aa chuahmi vialte lakah kum no bik in aa chuahmi sinak in tuanbia thar a tial.

Facebook founder a simi Mark Zuckerberg zong cun a hun lonh tinak a si. Zeica’tiah facebook ngeitu a simi Mark Zuckerberg cu kum 23 a si ah billionaire a rak ichuah. Biillionaire aa chuahmi vialte lakah kum no bik sinak tuanbia a rak tial ve.

A si nain, Kylie Jenner cu kum 21 a si in billionaire mirum sinak ah aa chuah caah Mark Zuckerberg billionaire a rak ichuah lio nakin kum 2 in a kum a no deuh.

Kylie Jenner cu tamhnak thilri (Cosmetics) phunphun a zuarmi a si. Phundang cun Tamhnak thilri ser zuarnak company a ngeimi a si. A company nih an chuah/sermi tamhnak thilri hna cu mirum le mipi nih an uar ngaimi a si caah a thancho ning a rang ngaingai.

Kylie Jenner company aa thoknak cu kum 4 telawng a si rih nain, US ramchung um states dihlak an zuar, cun online zongin an zuar chih. Ulta stores, dawr 1124 in US ramchung kipah a tamhnak thilri chuah/sermi cu an zuar hna.

Kylie Jenner company nih a sermi/chuahmi tamhnak thilri pawl cu a man in an tuak tikah $900 millions tluk hrawng a si. Cun zeidang in siseh, amah pumpak kutchung ummi he cun a ngeimi phaisa cu $1 billion a tling ko tiah an langhter. Kylie Jenner nihcun fak piin mah ka rian hi ka zuam, cucaah ka tamnak sermi (Kylie Cosmetics) cu a kal thluahmah rih ko lai tiah Forbes sinah a chim. #The Hill