CHRO: Paletwa Khuami Pa, Bom Nih A PuahHnawh, A Nunnak A Liam

Tuzarh chungah khan India ram lei kam deuh in Kawlram he ramri khua deuh a si vemi Mizoram, Lawngtlai District chungah pa pakhat nih vawlei chung phummi bom cu aa lamhchih sual caah bom nihcun a puahhnawh.

Mah thil a cannak tak cu Cawnni khat ni (Monday), mah tein iuknak nawl a ngei mi Chakma  (Autonomous Council Area) ah a si. Bom puahhnawh a tongmi pa cu Bangdukbanga khuami, a min ah Biranda Kumar a si. A ke khatlei tanpiak a si tiah a hawipa pakhat nih Khonunthung sinah a chim.

Ramtang a vahvaihnak ah vawlei chung phummi bom cu aa lamhchih sualmi a si. Bom cu a pinh tuk lem lo caah a hliamh lawng aa hliam. A ke khatlei cu siin ah an tanpiak tiah a hawipa a simi B. John nih a chim.

Khua mipi hna nihcun mizei hriamtlaibu seh nih an tarhmi bom a si ti cu a chim kho lo nain, Rakhine hriamtlaibu (Arakan Liberation Party, ALP) an si lai tiah an zumh hna. Arakan Liberation Party (ALP) cu Kawl cozah le Ralkap hna daihnak hnatlaknak (NCA) min a thu cangmi hriamtlaibu an si.

Mah bom tarhmi cu caansau a rau cangmi si dawh a si an ti. ALP hriamtlaibu nih a luan ciami caan ah mah hrawng hmunhma ahhin an rak tarh theu tawn, ai lamh sualmi zong an rak um len bal tiah B. John nihcun a chim.

January 15, 2019 ahkhan Bangdukhanga khuami pa pakhat a min ah Jitua Tongchongya zong bom nihcun a rak puahhnawh, fak ngaingai in a rak ihliam. Cu hnu ni 3 a rauh hnu ah, Kawn khuami pakhat zong mah bantuk bom nihcun a puahhnawh nakin a rak thi.

Cun, February 25, 2019 lioah AA (Arakan Army) hriamtlaibu umnak lam chim dingin Kawl ralkap nih hramhram in an fialmi/kalpimi Paletwa khuami pa pakhat, a min ah Aung Lun (45) cu vawlei chung tarhmi bom nih a puahhnawh caah a nunnak a liam tiah CHRO (Chin Human Rights Organization) nih Theihternak (report) a langhter.

Source: CHRO, Khonunthung