October Thla Donghlei, US Kal Dingmi Leet An Tong Than

Tuan ah, October thla chung US dingmi an tlawm lainak kong le, thla 21 hnu lawngin kal thok a si te lainak kong cu ka rak langhter bal nain, US lei thawngpang a ttha hoi lo.

October 23 le 24 ah US kal dingin kalnak kong thawngthanh a si cangmi hna cu an dih lakin leet an si than hna. Kal dingin thawng an thanh hna a thaizing ah nan kal kho than rih lai lo tiah an chawnh than hna hi a si.

Atu lioah, US kal dingin a hngakmi hna caah cun vanlawng cung tthut hlan lo paoh hi cu kan kal tak cang ko lai tiah chim ngam ding a si rih lo. Cucaah, rian zong tuan ah idinh hmasa lo ding le umnak inn tehna ap rih lo dingin ka rak tial tawnmi kha si.

Kannih chung cu thi kan ichek cang, ca zong kan cawng cang zei paoh kan ilim cang, kal ding ni lawng kan hngah ko cang tiin rian chuah chung le daithlan in um awk a ttha lo. Zeicahtiah atu lioah cun kal lai nikhat aa duh zongah leet than a um lengmang caah a si.

Cu hlan ahcun, cacawn khawh in kalni lawng hngah a rak si tawn ko nain, atu ahcun a si ti lo. Cacawn asiloah nunphung cawnnak cu US kal ding a simi hna paoh nih tuah hrimhrim dingmi process pakhat a si.

Atu lioah cun punghman case (normal case) pawl cu thi cheknak voihnih tiang aa tuahmi deuh ngawt an si hna. Voikhatnak thi cheknak na tuahmi khi thla 6 chung a nung. Mah chungah US na kal manh lo ahcun a voihnihnak thi cheknak na tuah than a hau lai.

Tutan ah, a kal dingmi pawl leet an si thannak a ruang bik cu US nih ram chungah ralzam luhternak an phih/khar rih caah a si. Trump nih 2020 caah ralzam laak ding 18,000 lawng a ti caah fingrilh rilhmi bak lawng an kal lai ti cu a fiangmi si ko.