Australia: 202 Visa Ngah Hnu, Kalnak Kongah Theih Herhmi

Atu lioah, Australia cozah nih ralzaam kan si’ah, ramchung ramleng i a ummi kan si’ah, a tam u an kan laaknak visa hna cu 202, 300, 200, 204 visa an si hna.

202 visa timi cu kan theih cia cio bang, atu lio ramleng ummi ralzaam (UN card ngeimi, Ngei lomi kan si’ah) paohpaoh Australia ram a phan cangmi thisen le laihritlai a simi nulepa ulenau hna nih vun kawhauh khawhnak visa a si.

Visa na ngah tikah Malaysia-Australia tanzung nih min thut dingin an in kawh lai, nain na ngahmi visa, “Immi-Card,” timi tu cu nangmah kut chungah an in pe lai lo, “Approval Letter asiloah Grant Visa Notice,” timi catlap tlap thum hrawng an in pek lai. A si nain, na visa, “Immi-Card tu cu IOM (UN zung) ah an in kuatpiak lai. Zarh 2 in zarh 3 chungah IOM (international Organization For Migration) nih kalnak vanlawng ticket man na peknak ding hmun le a man kong an in hal lai.

Zeicatiah, Australia lei in an ko-autu a simi hna nih Canberra zungpi ah na kalnak ding vanlawng man cu va pek khawh a si ve. Asiloah Malaysia IOM zung zongah na pek khawh thotho, nangmah duh thimnak a si lai.

Malaysia ah ka pek ko lai tiah na ti hna ahcun, ticket man a zat le peknak ding, a ni le caan IOM nih an in chimh than te lai. Malaysia ram in chuah khawhnak nawl, “Exit Permit,” timi kha UN card a ngeimi nan si ahcun IOM nih Malaysia Immigration zung ah an lakpiak hna lai, nanmah tuah ding zeihmanh a um lai lo.

A si nain, UN card a ngei lomi (asiloah nulepa lawng a ngei i fale a ngei lomi) hna cu “Exit Permit,” laaknak kongah Malaysia Australia Tanzung nih tuanvo an in lakpiak ve hna lai. Malaysia Immigration zungpi ah kutpi nan va nam a hau te lai. Nan kalni belte tu cu UN card a ngeimi nakin a rau deuh te lai. Australia visa nan laak hnu in thla 5 hrawng nan rau kho.

Visa na ngah hnu, Australia na kal hlan ah AUSCO (Australia Cultural Orientation Class) Australia ram zatlang nunphung cawnnak timi kha ni 5 chung na kai ta a hau lai. Cun na kal lai ni 2 aa duh ah pre-medical check up (thi cheknak) na tuah ta a hau lai.

Visa 300 kan timi cu nupi/pasal i kawhauhnak visa a si. Visa na ngah tikah Australia Tanzung nih visa na ngahmi “Immi-Card” cu nangmah kut chungah an in pek lai. Immi-Card na kut chungah a um lecangka in IOM ah Australia na kalnak ding kong he pehtlaiin ruahnak na va hal colh hna ahcun a tha deuh lai.

Visa 200 kan timi cu “Refugee process” tein UNHCR zung RST/DSU department nih Autralia ram kal dingin an thimpiakmi hna le interview an tuah hna hnu i Australia a kal mi hna khi an si. Visa 200 hi aho paoh nih kan i fian ciami a si ko lai tiah ka zumh ko…

Ralrin ding;

Visa hlam dingin Malaysia Australia Tanzung ah min na thut khawh hnu ah ruahnak halta hmasa loin, vawlawng ticket na caw colh lai lo. (Astralia kalnak 202, 300 visa a siah, US kalnak 93 visa a siah) minung tampi nih an cawk ciami vanlawng lehhmah man an sung theo tawn

Catialtu: Salai Eric Cenhrang

Theihternak: Copy or website in post a ngah lai lo (pumpak timeline lawngin a ngah lai)