USCIS’ Kawhauhnak Kongah Mi Min Hmangtu (US Phan Ciami Hna) Le Min Ngeitu Tak (Malaysia Ah A Taang Rihmi Hna) Hna Dirhmun

US

Atu lio, USCIS zungpi nih ralzam sinak in US a phan cangmi kan Chinmi cheukhat hna cu rammi sinak (Citizen) soknak kongah siseh, midang min rak hman ruangah zumh lonak (fraud) kongah biatak tein kawhauhnak an tuah cuammah hna hi a si.

Mahhi thil a cangmi kong he pehtlaiin ruah lo awkah a tha lo ngaimi thil dirhmun pahnih an um. Cucu, “mi min in US a rak phan cangmi hna dirhmun le atu lio Malaysia ram ah min ngeitu tak a simi a taang rihmi hna dir hmun,” hi an si.

Zeicatiah, atu lio thawngpang catialmi tete kan zoh hna tikah a tam deuh cu Sihni hlannak kong deuh hi an si. US phan ciami hna nihcun Sihni cu an i hlan khawh tak men ko hna lai, nain Min ngeitu tak a simi Malaysia ram ah a taang rihmi hna nihcun Sihni hlan cu a ruah awk hmanh an thei theng lem lai lo dah.

Mahhi zawn hi dirhmun har ngaimi ah an cang. US a phang cangmi hna nihcun, “Malaysia palik tlaihkhih le thongtlak kan rak ttih tuk ruangah midang min ka rak hmannak hi a si ko,” tiah i phuan than ding cu thil har ngaingai a si ve.

Min ngeitu tak, Malaysia ah a taang rihmi hna nih le lungsau tein le harsa ngaiin US kal ding cu vansang emem in an hngak ve rih ko hna. Malaysia UNHCR zung nih nan min in midang US ah an phak cang caah lungsau tein nan hngah rih a hau tiah a ti ve hna.

2018 kum hramthok (naite) zongah khan US lei in a rak tlungmi DHS (lah-wah-kah) officers pawl nih min ngeitu tak a simi pawl hna cu, “nan min in a phan ciami pawl an um caah ton le biahalnak (a herh ahcun dantatnak tiang) kan tuah hmasa ve hna lai, rak hngak rih uh, a rau deuh kho men,” tiah an titaak ve hna.

Mi min in US a rak phan i USCIS zung nih kawhauhmi hna caah cun tawthling a za ngai ko lai, “Sihni hlan maw, kan biak Pathian hmai ah?” timi karah, “keimah hi min ngeitu taktak cu ka si ko,” tiah lih (fraud) chim than a fawi temi a si ve ko.

Min ngeitu tak (Malaysia ah a taang rihmi hna) caah cun Kawlram kir than ding hi ttih-lah le zenh bikmi cu a si ko, a hleice in chungkhar he khuasa a simi hna caah a si khun.

Cucaah, dirhmun pahnih kan langhtermi ahhin azei deuh, aho deuh dirhmun tiah tanhnak le soiselnak um lo tein kan langhtermi a si caah “thil tha” hmuh thiam tu i zuam hram hna usih.