Australia Nih Indiah Pa Cu A Chuahkehnak Ram Ah A Kuat Than Lai

Australia ram cozah phunghram zong mipeem caah cun tihnung a rak si ve ko, ramchung phung a buar lengmangmi hna caah cun.

Australia ram nawlngeitu bu AAT (Administrative Appeals Tribunal) nih Paramjeet Singh, kum 39 a simi Indiah pa cu a phung buarmi/sualnak a tuahmi an relpiak tikah voi 30 a si cang an ti.

A ngakchiat liote kum 8 a si kum, 1988 ah amah hringtu a pa a umnak Australia ram, Sydney khuapi ah a rak phanmi a si. Kum 10 a um hnu 1998 ahkhan Australia ram zungzal um khawhnak (permanent resident) a rak hmu. Australia ram ah kum 30 leng a um manh cang tinak si lai cu.

Sualnak a tuahmi hna cu innchungkhar buainak, dawrkhan bauh i thil fir, hriamnam he buainak tuah le credit card deu a simi hman hei tibantuk pawl khi an si hna.

A voi a tam cang caah Australia ram nawlngeitu bu AAT (Administrative Appeals Tribunal) nih zungzal umnak (permanent resident) an rak pekmi cu tukum April thla ahkhan an rak hnonpiak than caah amah chuahkehnak ram a simi India ram ah kuat/khirh than dingin biachahnak an pek.

Mr. Singh cu nupi zong a ngeimi a si i nikum ahkhan fanute zong a ngeimi a si caah a nupi caah cun tuar har ngai a si ko.

Ref: SBS