UN Card Ngeimi Nih, Community Card (Min Dang) Hmang In 202 Sawk Le Malaysia Lah-Wah-Kah (Immigration) Phung

Vawlei cung ram vialte nih “midang sinak fir or min fir le lih,” (Identity Thief le Fraud) cu an doh cem ciomi le phungbuar phun pakhat ah an chiah ciomi a si.

Australia cozah nih 202 visa hmang in Chin ralzaam caah lam kaupi an kan awnpiak kan ti lio caan ah Malaysia um Chin ralzaam a simi hna le 202 visa a sawk duhmi hna nih ningcang deuh tein kan sawk awk a si ko.

A hleice in, UN Card a ngei ciami hna le bang nihcun Card ngei lo, mi min dang hmang in kan sawk awk hrimhrim a si lai lo. (Takchunhnak ah, Australia phan ciami hna nih unau min cazin chungah an rak khumhmi (Kawlram in ramleng chuak ti lo dingmi a unau) hna can-ai ah 842 form tialpiak in Australia cozah nih an kan thei lem lai lo tiah 202 visa sawknak tuahpiak khi chim duhmi cu si.)

Australia cozah nih an in theih sual hna lo hmanhah Malaysia ram chungin na chuak kho hlei lai lo. Zeicahtiah, kan theih cio bangin Malaysia cozah le UNHCR hna cu hmun khat teah riantuan timi an si.

Malaysia Immigration nih ralzaam kan sinak detail (finger print, eyes scan le pumpak Bio-data) hna cu UNHCR sinah a lak dih hna. A suallam cu Malaysia Immigration (lah-wah-kah) nih ralzaam kan konglam le bio-data cu a ngeih ve hna tinak si ko.

Cucaah 202 visa cu va ngah sual hmanhlaw, mi min dang hmang in Community Card aa tlaihmi na si lai caah Malaysia ram chungin chuahnak nawl (Exit permit) lak na hauh tikah Immigration (lah-wah-kah) nih na kutpi an in namter (finger print) te lai.

Khitikah Malaysia Immigration nih UNHCR sinin na konglam an rak lakmi na kutpi nam (finger print) cu an hmuh te lai caah a cung i kan tial bangin “midang sinak fir or min fir,” (Identity thief) na sinak cu an hmuh lai i an in kham te lai. Ramleng na chuak kho hlei lai lo.

Chin Modern News