Malaysia Ram, Kum 2013-2017 Chungah Kawlrammi Thahnawnnak A Rak Cangmi

Malaysia ram ah kum fatin in Kawlrammi  thahnawnnak a um peng caah, Malaysia ummi kan Chin ralzam hna zong nih rian kan tuannak ah si seh, ka umkalnak kakip ah ralring tein um izuam cio hna u sih.

2013 Kum: A luan ciami kum 2013, June thla chungah Kawlram miphun a simi hna le Rohingya Muslim miphun pawl hna cu biaknak kong i buaibainak ruangah Selayang market, Ampang le Kampung Baru hna ah thahnawnnak a rak cang i Kawlrammi minung 4 an rak thi, i minung 250 hna cu palik nih chikhat caan chung an rak erh hna.

2014 Kum: Penang ah kum hramthok in a rak cangmi thahnawnnak ah Kawlrammi minung 18 an rak thi. Thah a tongmi pawl i an ruak hna cu an hngawng ah nam in ahnak hma an hmuh hna. Mah bantukin mithattu a simi hna hi gangster pawl an si ko hna nain 2012 kum thok in a rak cangmi Buddish le Muslim biaknak buaibainak ruangah Kawlram Muslim pawl le Rohingya Muslim pawl telh in leirawinak an tuah i an thahtermi hna an si tiah palik nih an langhter. 2014 kum, December 11 ahkhan Malaysia palik pawl hna nih mithattu a simi hna le leirawitu a simi hna pawl cu minung 20 an rak tlaih hna.

2015 Kum: August thla ah, Selayang market tisik anhnak zuarnak dawrpi chungah misual a simi Kawlrammi minung 2 le Bangladesh rammi pakhat hna nih Kawl rammi minung pakhat an rak thah. Palik pawl nih meithal kuan hra a tangmi pistol tawi an rak hmuh i mahbantuk thahnawnnak a rak can lio i thil zuartu a rak simi Kawlrammi nu pakhat sinah dothlatnak an tuah hnu in misual minung pathum hna cu an umnak hmun Puchong ah an va tlaih hna. Mah misual minung pathum hna hi Selayang market hrawnghrang ah mi phaisa chuh a hmang ngaimi mifir damiah zong an si tiah an ti.

2016 Kum: Jannuary 13 ahkhan mawtaw pahnih in minung 5 hna nih Selayang market thotho ahcun meithal in an rak kah hna i Kawlrammi minung pakhat le ngakchia kal thiamka a simi pakhat an rak thi. Palik pawl nihcun misual minung pahnih an rak tlaih hna i cu ka hmun hrawnghrang i a ummi a tam u in Kawlrammi  an si hna minung 119 hna cu palik pawl nih chikhat caan chung an rak erh hna tiah an langhter.

2017 Kum: Jannuary 5, zan suimilam 10:25 Pm ah Sri Serdang i a ummi sehzung pakhat ah Kawlrammi riantuantu minung 15 hna cu vainam in mithathmang (parang-wielding men) a simi misual minung 4, angki nak aa hrukmi hna nih an umnak inn i an tin lioah an zuanhhnawh hna i thlachiat ruahnak um loin vainam cun an sam hna. A hmun ahcun kawlrammi minung 4 hna cu an thi colh. Cun minung pakhat cu Serdang siin ah an tholbul lioah a nunnak a liam than. Cun a dang minung pahnih hna nih tuknak hma fak an tuar tiah pawngkam riantuantu hna nih an langhter.

(TSO, NST)