UNHCR’ Zung Hmai Mitthli

Malaysia ah a ummi ralzaam dirhmun in khua a sami kan diklak hi ka ton ciomi le kan lung chung tein har kan ti ciomi “hnabei donghnak le lungretheihnak” (desperation or worry) hna hi ai khat cio lai lo nain, a tlaangpi incun kan dirhmun cu ai khat ko hna lai tiah ka zumh.

Kan ram, Kawl cozah ralkap uknak tha lomi tangah sifaknak, harsatnak a phunphun le hremnak phunphun, kan ton ruangah midang ram a simi Malaysia, India le Thailand…etc, hei tibantuk ah ralzaam sinak dirhmun in khua kan sak hna tikah hin, innchungkhar ah pa bik a simi le nu bik a simi hmanh nih kan lung chung i a ummi lungretheihnak le awlokchonnak hna hi aa lo cio hna lo. Nulepa hna nih fale an hmailei kong kan ruahpiak hna tikah kan van a sang, an sianginn kainak le an fim cawnnak kong kan ruahpiak hna tikah kan ngeih a chia kan lung a rawk. Mah ram si lo midang ram ah ralzaam dirhmun in cun “nuhrin covo” a simi “chance” zong zeihmanh kan ngei fawn lo tikah, cozah he aa pehtlaimi fim cawnnak sianginn le siizung hna ah kal khawhnak nawl kan ngei fawn hna lo. Kanmah le kan rian cio kong zong ah lungretheihnak in kan khat hna.

UN Card tha tein kan itleih ko zongah sahngar le tlumpi pawl hna nih cun cinghngia sathi hal bangin an kan bawh i kan ngeih chunte thlanhripi puut in kan tuanmi cu an kan chuh dih hoi fawn, zeiti ti awk nih le an tha tung hoi loh arti dirhmun bantuk si tung ah cun, an kan suk zong ah mah kuai, kan suk hna zong ah mah thotho kuai kan si tung. “Pakhat pa le bang nih cun aw, Malaysia sahngar pawl hi cu kan khua lam ahcun ichawk ve hna sehlaw cu ka ngiar cawlh ve hna hnga a ti an ti, a khua cu ka chim la loh…hehe.

UN zung nih zeitik ah dah an ka/kan kawh ve te hnga ti lawng cu tthal caan tikang hngah in kan hngaak cio hna. Atu lio cu, kan theih cio bantukin RST zung in kan in kawh hna tiah ingeih ngai in zung ah cun an va kal tak tikah, mi min khatmi (fraud case) nan si tiah an ti hna tikah zung chungah cun mitthli he a khatmi kan tampi hna. Zung nih kawh/auh cu kan duh tuk cio ko hna nain kan konglam (case) phiitmi tlam a tlin theng lo tikah awlokchong in kan um hoi than.

A si nain, UNHCR (United Nations High Commissioner For Refugees) rian tuannak pi cu a hleice in ralzammi hna caah a si bantukin, ralzam a simi a kan chanhchuahtu le lunglawmhnak tampi zong an kan petu an si. Mi tampi nih chun mang hmanh ah kan rak manh bal lomi American ram, Australia ram le Europe pawl hna ah kan phan kho te lai tiah kan rak iruah bal lo nain a kan phaktertu cu UN riantuanank thawngin a si. Cu tikah ram thumnak (third country) ah kal kho dingin dirhmun a phanmi hna caah cun lunglawmhnak mitthli a luang ve than tawn.

Laimi cu chungkhat sahlawh rualchan le hawikom theihhngalh pawl aa tlaihchan ngaimi miphun kan si. Kan umkal lai i vai ithlah ta le vai ichawnhbiak ta hei tibantuk khi a uar ngaimi miphun ka si hna bantukin, zaan khawdei kan itopi cang ko zongah UN zung hmai i hman van i thlaak (tuchan holh cun van izukzek) ti ta kan hmang ngai hna. Cu dih cun, zung chungah kan vung lut cang lai van ti ahkhin cun nguingui thlathla in then lai isian lo ruangah kan tap hna. Capo in ka ti tawnmi hna cu, “ziahhme US kal hlan ah le nan kan kawh bal lo tiin awlok nan kan chawnh, nan van kal tak ah le thi dengmaang in nan tap fawn,” ka ti hna i an ni than tawn…

Hi vial hin si rih seh, palhnak a um sual ahcun a ruahzia ka thiam hram uh… Upatnak he,

Ca tialtu

Salai Cenhrang (Eric)