Zomi: Gen. Min Aung Hlaing Ralthatnak Min Laksawng Pekmi Kan Cohlang Lo

December 4, chun ah Rangon khuapi hrambunh Tedim (Zomi) Catholic bu nih Kawlram ralkap bawi zik Gen. Min Aung Hlaing, ralthatnak min (Gal Hang Pah Tawi Na Award) laksawng an pekmi cu amah Tedim (Zomi) lila nih an cohlan khawh lonak cathanh an chuah colh ve.

Chin miraltha timi min upatnak laksawng an pek timi thawngpang nih Zomi miphun chung lawng hmanh siloin, a dang tlangcungmi vialte hna zong an khuaruah a harter dih hna.

Mikhamhtu Bawi Jesuh Khrih chuah lawmhnak ah dawtnak in thla va campiak, thluachuah va halpiak le laksawng va pek cu a tha tukmi le a sunglawi tukmi thil an si ko. A si nain, Chin miraltha sinak min laksawng an peknak kong he pehtlai in, Zomi Chin miphun in siseh, biaknak he aa pehtlaimi hruaitu dang hna in siseh, zatlang nunphung bu in si hna seh, miphun hruaitu si hna seh, a dangdang lei in hruaitu si hna seh, ramkhel riantuannak bu hna in siseh, mah laksawng peknak ah theihpinak le aiawh in thlah/fialnak zeihmanh (zeihmanh) a um lo.

A dikmi Federal rampi dirh dingin rampumpi deihnak caah riantuan cuahmah lio caan zongah tlangcung hriamtlaibu hna le Kawl ralkap hna cu ral an thawh ning a zual hma chinchin. Ral tih ruangah khua le ram chuahtak in ramtang ah har a tuarmi tampi a um lio caan zong a si. Rampumpi chung zongah lo, hmun chuhnak le taza cuainak, vawlei hmun lawngmi cungah phung thar sernak hna he pehtlai in sungh zatlak an ton cuahmah lio caan zong a si.

Cucaah Tedim (Zomi) min bunh in bu pakhat te nih Chin miraltha sinak min laksawng an peknak nih, ramchung deihnak, miphun remnak, dawtnak le i lungrualnak a dawnkhan khotu tuahsernak a si kho ti kan ruah caah kanmah Zomi Chin miphunpi he pehtlaihnak zeihmanh an ngei lo tiah mah cathanhnak ca hi kan chuah tiah Pu Pa Thang, Kim Tuang le GSMang hna nih an langhter…

Chin World