Saya U Aung Myint Oo: Mirang Holh Cawh In An Holhmi Nih Kawlholh, Man A Niamter

Ram ramkhat chungah zapi hman ding holh (comm0n language) ngeih cio a si bantukin, mah holh le mah ca te cu tlaihchan cio cu a si ko.

Kanmah Chinmi/Laimi zong nih kanmah le holh te cu a tlaihchan bak vemi kan si hna. Mah holh, Mah ca kilven hi cu a tha tuk hrinhran ko, nain zeitidah holh cawhpah kong he pehtlai cun nan hei ruah cio.

Rangon hrambunh, Kawlca chimhcawnnak zungpi ah lutlai, Professor U Aung Myint Oo nih cun “Kawlholh ah Mirang holh cawh an hmanmi nih kan Kawlholh le ca man (value) a niamter tiah cawnpiaktu a simi hna ton/pumh biachimnak ah a chim.

Mah bantukin Kawlholh holh pah buin Mirang holh cawh a hmang deuhmi hna hi a tam u cu fim cawnnak sang deuh a ngeimi pawl hna an si.

Cun micheukhat deuh pawl nihcun Mirang holh cawh pah buin biachim khi style pakhat an ruah ko rua. Cun micheukhat pawl nihcun icua/porhlawtnak ah an hman, Mirang holh an thiam pahmi khi midang nih kan thei hna seh tinak caah an hman tiah Professor U Aung Myint Oo nih a chim.

Dr. Than Than Htye nihcun, tuchan Kawl moni hna nih Mirang cawh pah in biachim an hman tuk cang caah hmankelmi nunphung pakhat bantuk ah an ruah cang. Mirang holh in holh caan a siah, Kawlholh in holh caan a siah, cawh lo tein anmah le holh caan teah holh cu hman si ko hna sehlaw thanchonak zong a um deuh lai.

Mah cu ti a si lo ahcun, kan Kawl holh/ca hna hi kan thlau te sual hna lai ti phan a um ngai ko tiah Dr. Than Than Htye nihcun a chim ve. (DVB)

https://www.youtube.com/watch?v=GcMOMlRqJX0&feature=youtu.be&fbclid=IwAR05hZ9MPZJW6TLLKrzIqdEvjRdFHNCNd4qUm28sBf7r1Say88vU4hp1y6o