KIO: Kawl Ralkap Nih AA Kah A Ngol A Hau

Kawl ralkap bawizik Gen.Min Aung Hlaing nih rampi ikah deihnak thawngthanh a tuahmi chungah Rakhine hriamtlaibu (AA) an i tel lo.

Deihnak thawngthanh an tuahnak hmunhma hna cu, Kawlram Chaklei ah bunhmi ralhruang, Nichuah chaklei hmunhma, Nichuahlei hmunhma, cun Nichuah laifang ah bunhmi ralhruang hna le kil thum (Triangle) hmunhma ah bunhmi ralhruang hna lawng an si.

Rakhine hriamtlaibu (AA) umnak cu Kawl ralkap nih bunhmi Nitlaklei ralhruang chungah a um a si caah ikah deihnak an thanhmi chungah aa tel lonak a si.

Cucaah, Kachin KIO nih hruaimi Chaklei tlangcung hriamtlaibu vialte hna nih Gen. Min Aung Hlaing thanhca cu an lungtlinpi ve lo. “Rakhine hriamtlaibu (AA) hmunhma umnak Ntlaklei ralhruang zongah ikah deihnak a um tung lo ahcun kan nih zong kan dai ve lai lo,” tiah an leh ve hna.

Kachin (KIO) nih hruaimi Chaklei tlangcung hriamtlaibu chungah (PSLF/TNLA , MNTJP/MNDAA , ULA/AA) an i tel hna. December 27 ah an hruaitu cio a simi hna ton/biaruahnak le lungtlingnak an ngeih hnu ah mah ca hi an chuah venak a si.

Kawl ralkap lei nih Rakhine ram ah ikah deihnak kan tuah khawh lonak cu ARSA hriamtlai pawl ruangah a si tiah i chimkannak an tuah ve. Cucaah Rakhine hriamtlaibu a simi (AA) he biaruahti/ichimchawnhnak a um a hau tiah tlangcung miphun kongah khingthlai tuanvo ngeitu a simi U Maung Maung Soe nih a chim.

December 21 ah rak thanhmi ning ahcun Kawl ralkap nih tlangcung hriamtlai bu pawl hna cu bu khat tete in ikah deihnak kong bia kan ruah hna lai tiah aa tel. A si nain, Chaklei tlangcung hriamtlaibu nih an duh ve lo, nan kan ton ahcun hmunkhat teah kan i tong dih hna lai tiah thanhca an chuah ve.

Kum 2001 thok in kum 8 chung, mah ikah deihnak kong biaruahnak hi rak thok cangmi a si nain ikalhnak phunphun in a um peng rih. Atu cu ikah deihnak kongah biapi bik caan kan phan cang ko rua, cucaah cun mah ikah deihnak kong biaruah/tonnak cu Tuluk ram ah tuah a si lai i biangaitu dingah rampumpi ramkhel rian biaruahnakbu commitee a simi (FPNCC) chungtel a simi hna zong an i tel ve lai tiah U Maung Maung Soe nihcun a chim.

(Mizzima)