Suu Kyi: Rum Duh Ruahah Cozah Rian Tuan Ding A Si Lo

Rum duh ruangah cozah rian tuan duh cu aa tlak lo pinah a hman lomi a si tiah Kawlram ruahnak petu Daw Aung San Suu Kyi nih a chim.

Rum nan duh ahcun chawlehthalnak rian nan tuan ding a si ko, micheukhat cu rum duh ruahah cozah rian a tuanmi an tampi tiah a ti.

Cozah riantuan kan timi cu rampi thanchoternak caah le rampi himnak caah tuanmi rian lawng a si, a dang zeihmanh aa tel lo tiah a ti.

Cozah rian kan tuan lai i kan rum lai timi ruahnak ngeih cu aa ningcang lo takmi ruahnak a si. Cozah riantuan timi cu rumnak ding caah a si lo.

Zeicatiah, kan ram chungah hin cozah riantuantu vialte hna hi 100% ningin zumh awk kan tha ko tiah chim khawh ding a si lo, cucaah 100% bakin zumh awk kan tthatnak dingah kan i zuam a herh tiah Jan 9 ah a chim.

Mah cu ti zuamnak hmangin ram mipi nih cozah riantuantu hna cungah zumhnak a um ahcun kan ram zong thanchonak lam a panh ko lai.

Ram thangchon timi cu micheu nih tahning ah ram nih a ngeihmi phaisa zoh in a si kho men, asiloah ramchung minung pakhat nih ngeihchiah ning zongin an tah men ko lai. A si nain, kan nih cu cuticun tah awk kan tha lo.

Ram pakhat a rum maw, asiloah a sifak maw timi cu lungrualnak zeitluk dah an ngeih timi zoh in kan tah awktu a si. Cucaah tlukruannak/lungrualnak kan ngeih khawhnak dingah kan i zuam cio a hau tiah a ti.