Tuluk Nih Canada Pa Thih Dantatnak An Pekmi Cu Canada Cozah Lung Tling Lo

Canada rammi pa pakhat cu Tuluk cozah nih rithaisi zuar man sualnak in an rak tlaih i 2016 November ah kum 15 thongthlak le phaisa 150,000-yuan (US$22,000) liam dingin biachahnak an rak pek.

Robert Lloyd Schellenberg, kum 36 cu a luan ciami 2014 lioah khan Tuluk ram in Astralia le Japan ram ah kg 200 tluk a ritmi rithaisi  na zuar tiah Tuluk cozah nih an rak tlaihmi a si.

2016, Nov ahkhan cun kum 15 chung thongthlak dingin dantatnak bia an rak pek, nain kan hnung thla December 1 ahkhan Canada cozah nawlngeitu hna nih Huawei company i an phaisa tlaitu sang bik a simi Meng Wanzhou cu an rak tlaih caah ramhnih kar i hmuhthiaam lonak a chuah.

Huawei company phaisa tlaitu sang bik a simi Meng Wanzhou cu US zong nih company pehtlaihnak ah an herh ngaimi pa a si.

Cucaah, Tuluk cozah nih an rak tlaih vemi Canada pa Robert Lloyd Schellenberg zong cu nizan, cawnni khat ni (Jan 14) ah Tuluk ram, Dalian khuapi um, biaceihnak zung nih Robert Lloyd Schellenberg cu thih dantatnak bia an chahpiak than.

Tuluk cozah nih Robert Lloyd Schellenberg thih dantatnak an pekmi cungah Canada ram hruaitu Prime Minister Justin Trudeau nih a lungtlin lonak a langhter.

Tuluk ram nih thih dantatnak timi hi an duhning paoh in an hman, Robert Lloyd Schellenberg cu Canada cozah nih kan dirpi lai. Cun a herh ahcun kanmah he tangti ramdang kan hawile hna zong kan i sawm hna lai tiah Canada Primes Minister Justin Trudeau nih Canada ram media pakhat sinah Cawnni khat ni ah a chim.

VOA VOICE in ngeih khawh si>>>>>>>>>>

SCMP, VOA CNA