DHS (Lawahkah) An Phan Than Cang Lai, Nan Case Rak I Zoh Pah Cang Hna Uh

Malaysia, Chin ralzam chungin OPE/RSC interview a phi cangmi hna paoh (Lawahkah a hngakmi paoh) nih nan case tha tein rak i zoh cia cang hna uh Lawahkah interview tuahtu Officer (US’ DHS) pawl an rak phan than cang lai.

US Lawahkah interview tuahtu ding officers pawl cu atu thla dih (31 Jan, 2019) ah Malaysia an rak phan than cang lai caah phone tlaih le na case rak ralring cia cang.

Cun, midang min in UN a rak lutmi fraud case pawl, OPE/RSC a rak phi cangmi pawl hna interview tuah ding zongah (DHS’ special agency officers) pawl an rak phan ve lai. Annih belte cu March thla chungah a si te lai.

Midang min in UN a rak lutmi (fraud case) pawl nih theih dingmi cu US cozah an in cohlan taktak cang hna timi cu a um rih lo nain, cohlan khawh than awkah DHS’ special agency officers te nih nan konglam dothlatnak an tuah hmasa hi a si.

2017 kum lioah, Lawakah officers (DHS’ special agency officers) te nih fraud case zeimawzat cu interview an rak tuah cang hna nain, reject nak ca an rak pe hna i nawlnak ca tial an rak fial hna. (US’ DHS nih an hlawt cangmi hna cu nawlnak ca voikhat lawng tial khawh a si.)

Nawlnak ca an tialmi cu thla 8 hrawng a rauh hnu ah lehnak ca an pek hna. Lehnak phichuak ca an pekmi hna ahcun kan in reject thai hna ti siloin nan konglam kan dih kho rih lo, a herh ahcun biahalnak zong kan in tuah than khawh hna, asiloah phone zong in kan in chawnh than khawh hna tiah an ti hna.

2019 kum cu US nih chin ralzam kan dongh lei a si cang caah papek bantukin kan kong an kan tolrelpiak, RSC/OPE a phi cuahmahmi hna zong nikhat ah minung 20 tluk an si hna.