Las Vegas Thahnawnnak Kong Ah FBI Nih Biahal An Duh Ngaimi Ms Marilou Danley, US A Phan Than Cang

Stephen Paddock, kum 64 tarpa nih Las Vegas khuapi thahnawnnak a tuahmi cu FBI le palik pawl hna zong nih a ruang an thei kho lo.

ISIS ralhrang pawl nih caantha an vun i lak zau ve le kanmah minung a si, a luan ciami thla zeimawzah ahkhan Muslim biaknak ah ai thlengmi si tiah an hung ti len ve. Nain, FBI pawl nih an zum hna lo.

Tarpa hi rak tlai manh hna sehlaw cu a tuahmi thahnawnnak kong hi theih a si hnga nain, tlaih manh a si hlan ah amah tein a nunnak a lak caah a kong theih khawh a si ti loh.

Thahnawnnak a tuah hlan deuh konglam an dothlat tikah Philippines ram i phaisa ting 1 (US $100,000) a kuat tami an hmuh. Cu caah FBI le nawlngeitu pawl hna nihcun Stephen Paddock nih nupi ah aa tuahmi Ms Marilou Danley, kum 62 a simi Philippines rammi tarnu cu biahalnak tuah an duh ngaingai.

A si nain, Ms Marilou Danley cu Philippines ram caan in Cawnnihnih ni zan ah Philippines airlines in US ah aa rak i thawh tiah chirchanh pakhat nih a langhter. The New York Times nihcun a phan cang tiah an langhter ve.

Biafiang hal dingin a rak hngakhlang ngaimi hna FBI le nawlngeitu pawl hna khi an theih duhmi kong cu tlamtling in Ms Marilou Danley nih hin a chim thlu kho hna hnga maw timi cu ruah awk a um ve. Biahalnak cu a lang rih lo.

Ms Danley cu Philippines rammi a si i, Australia Passport aa tlaihmi a si tiah theih a si. Sept 15 ah Manila a phan, cun Sept 22 ah Hong Kong, cun Hong Kong in Sept 25 ah Manila a phan than tiah Immigration nih phungning tein an langhter caah a nih cu mah thahnawnnak kong he pehtlaiin lunghrinh ding a um lo tiah palik nih an langhter.

TST