US Tilian Harnak Minung Tampi Nih An Ton Cuahmah Lioah Soisel A Tong Ngaimi Pastor Pa

Pastor Joel Osteen cu tilian harnak a zualhmat cemnak Houston khuapi Lakewood Church Pastor a si. Zarh khat chung lawngah a thawngtha chimmi zohtu hna hi minung million 7 leng an si tawn.

Lakewood Khrihfabu cu minung 17,000 thutnak a tlummi biakinn ngan a si caah chawva lei zong in a rum taktakmi Khrihfabu an si.

A si nain, mah bantuk US ram Taxes peng Houston khuapi ah Tilian le ruah fak nih a den cuahmah hna lio i nunnak caah vansangau le awlokchong in dornak hmun le inn an kawl lio caan ah Pastor Joel Osteen nihcun a biakinn Lakewood Church cu a khar diam ai.

Houston khuapi chung um sianginn, biakinn pawl hna le zatlangbu inn pawl hna cu hartongmi dornak caah tiin kutka an on piak dih hna nain Lake Church cu Pastor Joel Osteen nih tilian ti a lut sual lai phan ah a khar tiin social media kip in an soisel.

Tilian le ruah nihcun Taxes peng um minung 300,000 leng harnak a pek hna. Mah chungah hin minung 30,000 hrawng cu lakhruak dornak hmun ah an chiah khawh hna. A si nain, Cawnni khat ni zaan tiang zongah minung a thongthong hna nih chanhchuahnak cu an hnga rih ko tiah an langhter.

Lakewood Church pastor Joel Osteen le a nupi nihcun Houston khuapi harnak tongmi vialte nan caah fak piin thla kan rak in campiak hna, kan khuapi a rawhnak le aa suaksamnak hmanthlak kan zoh tikah kan lung a tha hrim lo….tbk in Tweeter ah an langhter len nain harnak a tongmi pawl dornak caah kutka an on lo caah minung tampi hna nih social media in an soiselnak hna cu an langhter hi a si.

Mail Online