Chir Man Santlai Ti Lo, An Van A Sang Ko, US/UK Cozah Nih An Duh Ti Hna Lo

ISIS ralhrang pawl sinah tang dingin US ram Le UK ram cu an rak chuahtak i Syria hrambunh ISIS ralhrang sinah an rak lut. US ram le UK ram ah a rak pemmi an si nain, rammi sinak citizen a rak ngei veve mi an si. US ralkap nih IS ralhrang cu an tuk hna i an deetkhawt hna hnu ah an rak tlaih hna i Syria ram refugee camp ah an rak chiah hna.

US ram chuahtak riangmang in ISIS ralhrang ah a hung cangmi nute cu Hoda Muthana, kum 24 nute a si. Amah hringtu a nulepa hna cu Yemen rammi a si i US ramah Yemen ram aiawh in Lamkaltu kuzale (Diplomat) a rak tuanmi an si caah ramchung umkhawhnak nawl an rak pek hna.

Hoda Muthana, kum 24 nute cu ISIS ralhrang sin i a luh hnu ah fapa pakhat zong a va ngei, US dotu/leirawitu ah a cang ve. Syria refugee camp a umnak in US ram, Alabama ka chungkhar umnak ah kan kirte ve than ko uh ka chungle ka ngai tuk cang hna a ti len zongah US cozah nih an duh ti lo.

Shimima Begum, kum 19 nute zong cu ve bantuk thiamthaim, 2014 lioah ISIS ralhrang sinah a rak lut ve. Bangladesh ram in amah hrintu a nulepa nih UK ram ah an rak pempi mi a si caah Bangladesh rammi sinak le UK rammi sinak (Duel Citizen) a ngeimi a si. UK ram, London khuapi Bethnal Green ah khuasami an si. Fapa pakhat te Ducth miphun a simi pa he an ngeih.

Syria ralzam camp i an umnak cu chungkhar sinah kir than dingin UK cozah cu nawlnak a tuah len hna nain, UK cozah nih an duh ti lo, UK rammi sinak an rak pekmi citizenship zong an chuh than.

Mah hnu nu pahnih nih voikhat lungthawh ah an i tuah sualmi cu vawilei cung nih huat bikmi ralhrang riantuannak a si caah ahohmanh nih an zaangfak kho cio hna lo, rammi mipi hna zong nih social media chungah bia chiachia le bia fakfak in an soisel cio hna i ramchung ah kirter an duh ti lonak hna cu an langhter cio.