Kalay-Rangon Kalmi Bus Accident Ah Chinmi Tampi An Itel, Minung 8 Nunnak A Liam

Kalaymyo le Rangon karlak ah khualtlawng phortu High Class bus cu tuzing suimilam 6 Am hrawngah accident a tong tiah theih a si. Accident in minung 8 nunnak a liam, cun minung 25 nih hliamhma an tuar.

Kalay-Rangon High Class (6G/4) bus cu Napyidaw-Yangon mengtung tahnak 77/3-77/4 karlak an phak ah accident an ton i aa leh hi a si. Bus accident a tonnak a ruang cu a hnulei orhlei kam ke a kuai hnu ah lamkuarmi aa pahchih nakin accident a can hi a si.

Bus aa citmi khualtlawng minung 44 an si hna, minung 8 cu an nunnak a liam, minung 25 nih hliamhma an tuar. Cun hliamhma a tuarmi hna cu Myoh Kyawng Hteikne siin ah an chiah hna tiah bus cung cuang a si vemi Lian Tial nih a chim.

“Keimah cu kaa hnilh lio a si, bus aa lehka lawngah kaa hlau. A hramthok ahcun bus hi kehlei kamah a tlu hmasa, cu hnu ah orhlei kamah voihnih voithum hrawng khi aa let. A thimi le a hliammi tam deuh hna cu bus chung hmailei ah a thumi an si deuh. Keimah tu cu ka lu lawng tlawmpal kaa khawng, nain midang bawm kho dirhmun ah ka um. Bus accident a cannak ahhin Chin miphun deuh ngawt kan si hna tiah, Lian Tial nihcun a chim.” #Zalen