Kawlram Nu 3 Telh In Ramdang Hlawhhlang Nu 41, Malaysia Immigration Nih An Tlaih Hna

Malaysia ram ah hlawhhlang rian a tuanmi ramdang nu minung 41 hna cu Setapak chung, malitnak dawr (massage parlours) hmun 4 ah nawlngeitu lahwahkah (immigration) hna nih an tlaih hna.

Cun malitnak dawr ahcun mileng (customers) a simi ramdangmi pa 4 le Malaysia rammi pa 5, cun an managers hna le supervisers hna tiin Zarte ni (March 16), zanlei suimilam 4:30 Pm ah an tlaih hna hi a si.

Tlaih a tongmi hlawhhlang nu pawl hna cu Vietnam rammi nu 15, Thailand nu 12, Indonesia nu 10, Kawlram nu 3, le Cambodia nu 1 hna tiah an langhter.

An tuanmi rian cu B2B (Body to Body) timi takpum dihlak malit dih hnu ah sex an tuahpi chih hna. Minutes 45 chung caan an hmanpi hna, RM 150 in RM 190 an lak hna.

Mah malitnak dawr nih nikhat chungah an hmuh khawhmi phaisa hi Rm 10,000 hrawng lengmang a si. Phohte bantukin an dawr kal a leemmi hna pa pawl cu Bangladesh pa pawl, Tuluk pa pawl le Kawlram mi pa pawl an si hna tiah Zarhpi ni (March 17) thawngfianhnak ah Khairul Dzaimee nih a langhter. #TSO