Tuchun, UNHCR Lutlai Thar Le Community Pawl Meeting Thawngthanh

Nihin (March 18, 2019) ah UNHCR lutlai thar a simi Rep. Thomas Albrecht le Malaysia tlangcungmi community hruaitu hna tonnak meeting an ngei kho.

Tuchun meeting tuah cu thiltha lawngte an si, lutlai nih a chimmi bia pawl cu lung a hmui tuk tiah meeting kaimi hruaitu upa hna nih an chim.

2011 kum in zung lut a simi vialte, dornak kawltu (asylum seekers) pawl telh in, zung nih catlap an pek tawnmi hna cu Card in thlenpiak khawh kai zuam zau lai tiah Lutlai nih a chim.

Cun, hramhram in duhthimternak a simi option 1 le 2 cu kan thimter ti hna lai lo. A rak ithim ciami pawl zong an um ko, leet piak dih a si lai. (Option 1 le 2 cu a thi cang tinak si)

A hlan bantukin, RSD interview phitter i sungh le catlap chuh kha a um ti lai lo. Card nun caan lawng an in saupiak cang hna lai tiah a ti. Cun, nauchuak thar benhnak kongah ka lung tha lo ngai nain, tha tein zohfel than khawh kai zuam lai.

2013 zunglut a si i Card chuh cangmi hna pawl caah cun ka lung tha lo ngai, Asylum pawl zong nih min an thut cang, cun zung zong nih minthut cangmi a si caah a har ngai ko. A si nain, kai zuam lai Malaysia ah rian ka thokka lawng a si caah ka ruatthiam hram rih uh.

Mah konglam dohhlatnak (inquiry) tuahnak kongah zing suimilam 2,3 am in zung hmai nan phan i nan konglam itheih duh ruah ah harsa lengmang in nan itansi ti thawng kha ka theih tikah ka lung tha hrim lo. Cucaah atu hnu cu RSC/OPE nih MY number an pek hna mah konglam zoh khawhnak website bantuk an pek hna bantukin tuahpiak khawh kan zuam zau hna lai. Zung hmai ah vai itansi hau ti lai lo tiah a ti.

Mithar pawl zungluhnak kong he pehtlai in, tlangcungmi community bu dang zong nih halnak an tuah ve, a si nain lutlai nih a chim khawhmi cu a um rih lo.

Tuchun meeting ah tlangcungmi community bu kip an si hna caah biahalnak tampi an tuah, a phit cawk lomi hna zong a um len rih. A ni khatnak lawng a si rih caah a si. A si nain, community bu upa hna nihcun thiltha lei lawngte panh dingah ruahchannak tampi a um, ralzam zawn a kan ruat taktak mi lutlai a si tiah upa pakhat nih a chim.