Kawl Kum Thar Ah President U Win Myint Nih Thongtla Minung 9500 Nak Tam Luatnak A Pek Hna

Kawlram kum rel ning in 1381 kum, kum thar ni 1nak ni ah Kawlram chung thongtla minung 9551 hna cu President U Win Myint nih an sual man thongtlaknak in luatnak a pek hna. Mah chungah ramchungmi thongtla minung 9535 hna le ramdangmi thongtla minung 16 hna an si tiah U Zaw Tay nih amah timeline chungah a tial tiah VOA Burmese News nih a langhter.

Tuchun Kawl kum thar ni 1nak ni ahcun President U Win Myint, U Myint Swe le Pu Henry Van Thio hna nih kum thar ni biachimnak an ngeih hna. President U Myint nihcun kum 3 chung i an tuahtuanmi kong le i tthithruainak kongah thlennawnnak a ummi tete kong hna le thanchonak theipar an hmuhmi kong pawl a chimchih.

Cun atu lio Rakhine ram thilcang, ral ruangah harnak a tongmi kong he pehtlai in ramchung mipi hna hmunkhat ah tuanvo lak a herh ning le a ra laimi caan ah ramchung mipi nih nan iruahchan ning in cozah nih tlam kan tlinter khawh rih lomi hna zong hi a hlei in kan zuam ko lai tiah biacahnak zong a chimchih.

Cun Vice 1 a simi U Myint Swe a rannak bikin ramchungah deihnak tlamtling a um khawh zaunak ding kong le, cun Vice 2 Pu Henry Van Thio nih democracy a fehfuan khawhnak ding le ram a thancho khawhnak ding ahcun mipi lungrualnak ngeih a herh zia le ramchung dihlak mipi karlak ah i theihthiamnak, pakhat le pakhat izumhnak khawhnak lungput ngeih a herhnak kong a chim ve.

A si nain, Kawl miphun kum relnak i kum thar thongtla velngeihnak le luatnak President nih a pekmi hna thongtla chungah cun aho ho dah an itel ti cu theih khawh a si rih lo.

VOA Burmese News