Atu Lio, UN Zung Hmai Ah Thil Cang A Simi Thawngpang Bultan!

Atu lio, UNHCR zungah thil a cangmi tete ah a hman lomi biachokvai tete zong a um pah len. A ruang cu, Cawnni khat ni (June 17) ahkhan Rohingya ralzam pawl nih thawngpang a hman thlu lo deuhmi anmah le anmah an ithanh nakin a hung cangmi a si.

Mah cucu, Malaysia Chin ralzam sin zongah a vun phan pah ve. UNHCR zung hmai ah va kal in mithar min va pek khawh a si tiah a hman lomi biachokvai a hung um pah len ve. Haltu tete an um pah len caah ka vun langhtermi a si.

Rohingya ralzam pawl cu mithar minkhumh dingin UNHCR zung nih phone in an chawnh taktak ko hna, asinain an community bu ningpi ti awkin zung hmai ahcun an hung ra taktak hna. UN zung nih chawnhmi he chawnh lomi hna he, an dihlak ah minung 3000 hrawng an si.

Cawnni khat ni (June 17), zinglei dei hlan in zung hmai ahcun an rak dir lulh cang hna. Minung zeimawzat asiloah phone chawnhmi hna pawl cu min khumhnak (registration) a tuah taktak ve ko hna. Cun micheu khat pawl cu an bio-data an apter hna hnu ah inn an tinter hna.

Cun tuni (June 19) ah Yemen miphun a simi ralzam pawl hna nih UNHCR zung hmai ah an duh lonak an rak langhter ve. “Kanmah zong ralzam ka si ve, fimthiamnak a ngei lomi kan si ve, UNHCR bawmhnak kan herh ve,” tiah catar tampi he zung hmai ahcun an rak chuak hna.

Yemen miphun ralzam pawl hna hi Malaysia UNHCR nih vawlei cung ralzam zohkhenhnak tangah cohlang loin an hnonmi hna an tam ngei ve, micheu cu an ram ah a kir thanmi zong an um len ve. Tuchun duh lonak an langhter nak cu pical ngai a si ve, Media zong an ra, cun palik le tuanvo ngeitu hna zong nih hmunhma an lak ve.