Min-Thuat A Simi Hna Caah Atu Lio,Thawngpang Tawi!

Malaysia um Chin ralzam chungin min ikhah hrakhrol sinak ruangah zung nih rak hrenmi case pawl hna cu atu ahcun an konglam tolrel piak an hung si cuahmah cang hna. Ngandamnak thi-chek a tuah cangmi zong tampi an um cang hna.

Cun an konglam a thiang tiah US cozah le zung nih an cohlan cangmi hna cu US ram zongah a kalmi an hung um ngai cang hna caah thawngpang ttha ngai a hung si.

Min-thuat a simi pawl hna caah thawngpang ttha ngai a hung si kan ti tikah, min-thuat a si vemi cheukhat OPE/RSC le Lahwahkah phi cia a simi tampi zong kawh-auh lomi tampi um rih a si. Cun RST/DSU hmanh a phi ve rih lomi le, asiloah US ram caah siloin ramthumnak dang Canada, AUS le Noway… tbk, ram caah RST a rak phi cang ko nain min-thuat hrakhrol sinak ruangah hrenmi tampi um a si rih.

Min-thuat sinak hrakhrol hi vawlei cung ram kip nih cohlan lomi le a hleice in UN riantuannak ahcun doh bikmi a si. A si nain, atu ahcun US cozah le zung nih biatak tein khirhhlainak an hun tuah hnu ah an ramchung luut kho dingin a rem ko cang an timi case paoh cu cohlan hram an thok cang hna.

US ram a phan ciami nu/pa siseh, ramhnihnak taang a simi nu/pa siseh, an pahnih in an konglam khirhhlainak tuah dih veve cangmi an si ahcun cohlan an si. A hleice in, ramhnihnak taapmi nu/pa kha min ngeitu diktak a sinak ttha tein a rak chim/langhter khomi a si ahcun mah cu papek deuh an si.

Cun atu lioah, min-thuat a simi pawl, thi-cheknak tuah dih hnu ah OPE/RSC nih kawh-auh tthanmi tete an um ngai hna. Thinphan awk cu a si lem lo, min-thuat hrakhrol sinak cu security in thian a har lai, OPE/RSC le Lahwahkah lei in biahalnak tete um than lengmang khawh a si peng caah, kal laite tiangin leet than zong a fawite mi a si.

Atu tiang ahcun 2010, August 19 hlan ah zung luut a si i, min-thuat hrakhrol sinak ruangah zung nih hrenmi paoh cu US nih duhsah tein tolrelpiak a tim peng rih ko. Amah belte caan sau cu a rau rih lai ti cu a fiangmi a si ko caah lungsau tein hngah a haumi a si ko.

Theihternak: Copy paste in website ah post ngah lai lo, pumpak timeline lawngin share ngah.