UN Zung Kamah Misualpa Nih Lainu Pakhat Fir A Timh!

Tuzing (6 September), suimilam 8:30 Am hrawngah TB sii din dingin UN zungah a kalmi Chin ralzam nu pakhat cu misualpa pakhat nih fir a timh nain Taxi mawtaw mawng pawl nih an chanhmanh.

Fir timhmi Chinnu cu TB damlonak an ngeih caah a fate he zing chiar in UN zungah sii a dingmi an si. A fate tu cu a sidinmi course a dih cang caah tuzing cu amah lawngin sidin awk ahcun a rak ra.

Chinnu cu Zo Tung miphun a si, a umnak le a min tu cu kan langhter lem lai lo. A ttah tuk le a ttih/lau tuk caah amah cu biahal awk zong a tthat lo. Theih a duhmi nihcun hal khawh si. Zung a phanh lai, Taxi pawl an dir nak pawngah misualpa nih Chinnu fir a timhnak hmun cu a si.

Misualpa nihcun Chinnu cu hramhram in a tlaih i, thilri chuh zong tim loin a mawtaw chungah khumh a timh. Taxi mawng pawl nih Chinnu cu zing chiar in a tlun-kal an hmuh lengmangmi a si caah misualpa cu an hei hrocer len i cu karlak ahcun Chinnu cu zung chunglei panh in ttah bu he a zam kho.

Misualpa cu a hmutu hna le Taxi mawng nihcun India miphun asiloah Malaysia ram caansau um cangmi Rohingya miphun zong a si kho tiah an ti, nain a sinak hman tak an chin kho lo. Minak nawn, mipumrua ngan le pawpuar nawnpi a si ti tiang cu an chim.

Taxi mawng pawl nih misualpa cu bia an al len lioah cun misualpa nih thingtan saumi pakhat aa put chih, ka nupi a si tiah a lih in a leh hna nain an zumh lo caah Chinnu cu an bawmhnak hi a si.

Ralrin awk: Malaysia ram chungah ralzam dirhmun in khua a sami kan Chin mipi nih ralrinnak ah hmang cio hna usih. Kan umkal nak kipah khua hoiher buin um-kal hna usih.

Zei bantuk thil tha lo le mifir/misual kan tong lai lo tiah chim khawh a si hrim lo hih. Nu si ahcun mah pakhat lawng chawhvah zong ralrin kan hau. Chinmi cu ke in aa chawkvakmi kan si caah kan bek, phaisa bawm le phone tiangin lam kan kal tikah ralring tein bei/ken i zuam cio hna usih.