2020, Ralzam Caah US Kal A Har Cang Lai

Trump hruaimi cozah nih 2020 kum chungah vawlei cung ralzam chungin minung 18,000 lawng ka cohlan lai tiah Congress ah thanhnak a tuah cang caah ramhnihnak taang ralzam pawl caah cun US kal khawhnak lam cu a bi ngaingai ko cang.

Kum 2020 caah US nih ralzam cohlan ding milu a thmuhmi hi cu US ralzam cohlannak tuanbia ah a um bal lo. Tukum 2019 ah ralzam cohlan ding milu 30,000 in minsen a rak thut nain, mah zat hmanh cu tlin dawh a si ti lo.

A ruang cu, September le October thla 2 chung ca hmanhah US kal dingin hnatlaknak tuah piak cangmi hna hmanh kha an zapi ngawt in leet a rak si dih than hna.

Donald Trump hruainak tangah US ralzam cohlannak cu duhsah tete in an lohtlauter chin lengmang. Kum 1980 thawk in nihin ni tiang US ralzam cohlannak zoh tikah 2019 kum hmanh hi a tlawm bik a phan cang, 2020 chinchin cu chim awk a um ti lo.

August 2019, tiangah khan cun US ah ralzam minung 28,000 an phan cang tiah Refugee Processing Center nih an langhter ning a si. 30,000 ngaingai cu 2019 caah tlinter dawh si hoi rua lo.

2020 caah US ralzam cohlannak cu October 1 in rel hram thok a si lai nain, ramchung luhternak tu cu October 21 hnu in thok a si te lai tiah thanhnak an tuah. Mah chungah hin September le October thla chung i leetmi pawl kha tuahpiak than an si hna lai nain, micheu cu an thi tetdan a dih ruangah maw, asiloah security pakhat khat ruangah kal kho rih lo zongin um khawh a si.

Trump le a hruaimi cozah nih vawlei cung ralzam cohlannak a tlawmter chin lengmangnak ruangah US ram chung ralzam thialkamnak riantuantu buu zeimawzat hna cu an zung khar hau dingin an um hna.