UN Sawk A Duhmi Mithar Nih Theih Awkah Tlawmpal

Atu lioah, Malaysia ram um ralzam cheukhat nih UN’ kad thar sawknak kongah biahalnak a um ngai caah tlawmpal in ka vun langhter ve lai.

Malaysia UNHCR nih zung kal hau ti lo dingin online website cu mithar minkhumhnak, mah konglam hlathlainak, chungkhar/nuva/fa benhnak le a dangdang halnak tuah khawhnak ding caah an sermi a si.

A sullam cu kad thlau le kad nunter (extend) tuah ding dah ti lo paoh cu online website chung lawngin hal khawh an si cang tinak a si. A herh bikmi cu website chungin zeitidah cakuat ning a si ti kha biapi a si.

Website in zung cakuat ding cu a thiam lomi kan tampi kho men caah kanmah le zatlangbu a simi CRC, ACR tibantuk asiloah a thiammi hna sinah sawk/halnak tuah na duhmi tlamtlin deuh khawhnak hnga bawmhhal in tuah ah a ttha.

Malaysia um a simi kad ngeilo nihcun sawk ah a ttha ko, amah belte min pek ve sawhsawh le sawk ve sawhsawh siloin ralzam na sinak cu UNHCR nih ralzam sinak rikhiahmi tangah a ummi na si a hau ve lai. Voikhat na sungh hnu ahcun voihnihnak sawk khawh a si ve ti lai lo.

Cun theih dingmi cu a sawkmi paoh in cohlan le kad pek a si lai tinak a si lo. Website in minkhumhnak tlamtling na tuah dih hnu hmanhah zeitikah an in kawh lai or appoingment an in pek lai tiah chim khawh a si lo.

Amah belte website in mithar sawknak ca na kuat dih tikah ca an in leh lai, “Ca na kan kuatmi cungah kan ilawm, appointment pek in pehtlaih zau kan in zuam lai. Na sawknak reference number cu mahhi a si lai (Mah bantuk number lung 4 a simi, SUE:1234),” tiah an tial lai. Mah an in kuatmi na number te cu na chinchiah a hau lai.