Jesuh Khrih Chuahnak “Bethlehem Khua,” Sermon Tawi!

Jusuh Khrih a rak chuahnak khua “Bethlehem,” sullam cu, “Chang inn,” (House of Bread) tinak a si.

Bethlehem khua min an rak sak ning cu hitihin a si. A hlan Judammi hna tuanbia kan zoh tikah Bethlehem khua cu khualtlawng le mitlungkal a simi hna pawl i “dinhhmun,” asiloah “chuncaw,” anrak eiti hnanak khuate pakhat a rak si.

Bible ca nih “Judah ram ummi Bethlehem khua, nangmah cu Judah ram khuapi hna lakah a hme bikmi na si naisai lo; Zeicatiah nangmah chung hin hruaitu pakhat, ka mi Israel mi hna tuukhal a si dingmi cu a chuak lai, a ti” tiah Matthai nih a tial.

Judah ram chungah khua nganngan, khua dawhdawh le khua thatha an tampi ko nain Pathian nih Amah hrinhniang chuahnak ding caah cun Bethlehem khua kha aa thim ko.

“Dinhhmun,” asiloah “chuncaw,” eitinak hmun ahcun khualtlawng le mitlungkal pawl an hun i ton hna tikah, an “chuncaw rawl,” amah le kenmi cio cu an samh i hmunkhat teah misifak, mirum le bawi ti um lo tein le ahohmanh thleidannak um lo tein an chuncaw or chang an i hrawm cionak hna hmun a rak si caah “Chang Inn (House of Bread),” “Bethlehem” khua tiah a min cu sak a rak si an ti.

Bethlehem asiloah Chang Inn (House of Bread) nih sullam a ngeihtermi cu deihnak le remnak le nun ihrawmhnak hmun a sinak kha a langhter. Cucaah Isaiah nih “horkuang vialte cu chilh an si lai i tlang vialte cu chimh an si lai. Tlang cu hmun rawn ah an cang lai i a bingbo hmun cu rawn didiai in an um lai, Bawipa sunparnak cu a lang lai i mi vialte nih an hmuh lai,” tiah a ti.

Jusuh Khrih, Vanbawi hrinhniang nih dawtnak, deihnak, remnak le nun ihrawmh/icheuh duhnak thinlung a ngeimi hna sin lawngah “Bethlehem Khua,” chang i hrawm tinak hmun bantukin “Chuahnak Hmun,” ah ser a duh.

Na nunnak ah, na chungkhar ah dawtnak, deihnak, remnak le nun ihrawmh/icheuh duhnak nun cu na ngei ve cang maw? Jesuh Khrih nih na nunnak innka an kingh, nan chungkhar ah chuahnak hmun tha i ser a duh, tukum 2019 ah Bethlehem (Chang Inn) bantuk nun ngei in Khrih Hrinhniang Jesuh cu dong ve cang hna usih.

Salai Eric Cenhrang