Iran In Zuan Aa Thawhmi UKrain Vanlawng A Tla

Cawnnithum ni, Minung 170 phortu Ukrain vanlawng cu Iran ram, Tehren khuapi, Imam Khomeini Vanlawngtual in a zuan hnu tlampal ah a tla i a puak dih tiah Iran TV a langhter.

A tlami Ukrain vanlawng Boeing 737, vanlawng nambar PS 752 cu Iran ram in Kiev lei ah zuan aa thawhmi a si. Mah vanlawng hi an sernak in kum 3 telawng an hman rihmi a si

Ukrain vanlawng a puak i a tlami cu Ambulances mawtaw 22, bus 4 le helicopter tiin an chuahhnawh ko hna nain meikhu nih an zelh tuk caah chanh khawhmi zeihmanh a um lo tiah Iran ram lakhruak bawmchantubu lutlai a simi Pirhossein Koulivand nih a chim.

Iran ram Civil Aviation Organization in biachimtu a simi Reza Jafarzadeh nih vanlawng aa citmi minung 170 an si, a nungmi hohmanh an um lo tiah a ti.

Vanlawng a tlaknak a ruang bik ahohmanh nih an chim kho rih lo, a chung thil a rawkmi a um ruangah si lai timi zong an um ve bantukin Iran le US buainak  ruangah Iran nih kut an thlakmi si ko lai tiah a zummi zong an um ve.

The Times of Isarel nihcun Ukrain vanlawng a tlak hi Iran nih Iraq hrambunh US ralkap hmunkhuarnak hmun ballistic missles in an kahnak hna he a caan aa hlaat tuk lo tiah a langhter.

A si nain, Boeing company riantuannak lei biachimtu a simi Gordon Johndroe nihcun vanlawng a tlaknak kong he pehtlai in thawngpang kan khawmh cuahmah lio a si tiah a langhter.