Cauk In Malaysia A Rak Phanmi Ralzam Caah Theihtlei

A cung tlang kan tarmi kong he pehtlai in Malaysia Lah-wah-kah nih 2012 kum thok hrawng khan bio-metric minkhumhnak tuah an rak thok. A phunphun in ramchung um ramdang mi pawl hna cu kutpi namnak program an rak tuah i kutpi an rak namter hna.

Cun, tlawn duh sawh caah a rak rami si hna seh, riantuan ruah ah a rak rami si hna seh, ramchung ah phungning tein a rak lutmi paohpaoh cu Lah-wah-kah nih vanlawng dinhnak tual ah kutpi an rak namter dih cio hna.

Cu ruangah kutpi a nammi ramdang mi a simi paoh cu Malaysia immigration cozah sinah an kutpi nammi records a um zungzal tinak a si.

Passport in Malaysia ram a phan i kutpi a nammi nih na passport ning tein na min cu UN minkhumhnak ah na hman lo i mindang in minkhumhnak na tuah sual a si ahcun ramthumnak na kal tikah immigration kut in luat a har te lai.

Mah bantukin kan hnung thla chungah ramthumnak a kal dingmi minung pahnih hna cu kutpi nammi an rak si caah Malaysia immigration nih vanlawntual in an rak kham hna. Minung pakhat cu US a kalmi a si, cun a dang pakhat cu Australia a kalmi a si.

Kawlram mi veve an si, Malaysia ram an rak luhnak Passport min le UN asiloah ramthumnak kalnak an sawknak min aa dan caah a si. Cucu ramthumnak an kal lai, vanlawngtual i immigration nih an chuah lai kutpi an namter than hna nak in an theih khawhnak hna a si.

Cu hlan ahcun mah bantuk hi a rak um bal lem lo nain atu ahcun thil poipang pakhat ah a hung cang ve. Passport hmang in Malaysia a rak phanmi si kha a poi tuk tinak cu si lo, nain na passport min si loin min dang in ramthumnak kalnak maw asiloah UN a sawkmi na si sual ahcun cunih cun Malaysia ram chuahtak na duh than te tikah an donhkhanh khawh tinak a si.

A ruang cu A luan ciami thla zeimaw inkhan Malaysia Lah-wah-kah nih ramchung in ramdang mi a chuakmi paoh cu information background theih khawhnak ding caah kutpi namnak an tuahter dih cang hna caah a si.

Theihternak: Website in copy post a ngah lai lo (Pumpak timeline lawngin share a ngah)