Australia Chungkhar I Auhnak Kong Le Citizen Sawknak Kongah Thawngthanhnak

Australia Department of Home Affairs nih meeting a kan sawm i nizan ah cozah lei tuanvo neimi minung pathum hna he ton-biaruahnak kan ngei kho. COVID-19 zawtnak he pehtleih in thawngthanhnak kan tuahmi tlamtling tein nan community cio ah thawng nan kan zamhpiak caah lunglawmhnak tampi kan ngei…

Hi thawngthanhnak kan tuahmi ahhin miphun thleidennak kong he pehtleih in mi tampi nih nan rak zoh, nan rak share cio i kan i lawm tuk. Rian nan tuannak ah siseh, hmun dang ka dang nan um kalnak ah miphun thleidannak tuahsernak in siseh, hmurka in siseh nan hmuh nan ton ahcun Australia cozah sin le palek sinah report tuah colh hna uh tiah an kan ti rih.

Australia citizen a sokmi hna cu pakhat hnu pakhat in kan auh cang hna. Hi kong he pehtleih in caan zeimawzet cu kan rau lai. Cu lengah cun COVID-19 ruangah mah le State cio in tuan cio a si lai.

Ram hnihnak ah a tangmi chungkhar unau auhnak a tuahmi hna kong he pehtleih in Australia cozah nih riantuan hram kan thawk than cang tiah thawngtha taktak a kan thanh.

Chungkhar auhnak kong le citizen soknak kong ahhin Senator Dean Smith nih January thla Laitlang a tlung hnu in biatak tein Australia cozah sinah a kan chimpiak ruangah Australia cozah nih Community cio ah thawng thanh dingin hi bantukin theihternak an tuah than nak hi a si. Prime Minister Scott Morrison nih Election lioah bia a kamhmi hna cu atu ah pakhat hnu pakhat a pek thluahmah hna. Prime Minister ka tuan than khawh ahcun Kawlram mi kum thum chung pehtlai tein kan lak hna lai tiah a kan ti caah ram hnihnak a tangmi kan miphun caah ruahchannak tampi kan ngei.

Ralring peknak: Citizen soknak kongah Kawlram lei in a deu in cahmi catlap pawl hman hrimhrim lo ding.
Citizen sok tik le chungkhar unau auh tikah ca holh kan thiam lo ruangah a thiammi kan fial hna i a kan tialpiakmi kha aa lawh pah dih caah cozah lei nih lung hrinnak le zumh lonak a kan ngeihnak hi a si.

Catialtu: Renny Ceu Lian Mang