CRC: Australia Kal Umnak Thawngthanh

Malaysia um Chin ralzaam hawikom dawt vialte hna nan dam cio hna lai tiah zumhnak kan nei.

Australia kal umnak kong he pehtlai in thawngthanh kan kan duh hna. Kan theih cio bang Covid pulrai ruangah vawlei cung khawl tlawn le kal um zong phih dih asi bantuk in Malaysia um Chin ralzaam cheukhat hna zong Australia kal ding si ko nain kal kho loin aataapmi tampi an um.

2020 January thla in March thla tiang ah Australia kal ding ah Visa pek cangmi hi hngakchia chuakka he cun minung 120 hrawng an si. Interview a tuah cangmi le thi aa check cangmi hi chungkhar 62 an si i a minung cun 200 hrawng an si.

March 26, 2020 ah a kal dingmi tampi an um nain March 18 ni thok in lockdown a van i thawk caah ralzaam kal umnak tuanvo neitu IOM (International Organization for Migration) nih a kalding timhtuahmi vialte cu a let than dih. Ram khat le ram khat khual tlawn zong phihkhar dih asi caah tu chun ni tiang kal kho lo in um asi. Marh 18 in July thla karlak ah poipang (emergency case) asimi tu cu kalterni tete zong an um pah nain Australia cu ralzaam visa siloah humanitarian visa cun kaltermi an um lo.

Australia Tanzung (Australian High Commission) zong Covid pulrai ruang ah ralzaam interview le visa pek cu March 18 in an ngol ve i a tu tiang ngol rih asi. Zeitik in an thawk than te lai hi chim khawh si rih lo.

March 26 ah kal ding in rak timhtuahpiakmi hna cu a thar in timhtuahpiak than an si. Cheukhat cu an ngandamnak checkmi kum a luan cang caah IOM nih a thar in check-up an tuah than hna lai.

A tu hnu thawk in Australia ah a kal dingmi pohpoh cu Australia phanh hmasatnak hmun poh ah ni 14 chung erhkhumh (quarantine) asi lai. Tahchunnak ah na phanhnak ding le umnak ding kha Mebourne sisehlaw na vanlawng (flight) kha Sydney a phanh hmasat ahcun Sydney ah ni 14 chung erhkhumhnak na si lai tinak si. Ni 14 lawng ah na umnak ding hmun ah na va len than kho lai. Cun an mah le State or Territory cio nih zulphung (travel restriction) an tuahmi a um rih caah mah ning hoih in va kal um than asi lai.

July 23, 2020 thawk in Vanlawng cung khualtlawng milu zat zong rikhiah piak asi. Perh Khua a kalmi cu Vanlawng pakhat ah minung 50 tiang lawng cohlan asi. Brisbane cu minung 30 lawng cohlan asi. Sydney zong minung 30 lawng cohlan asi. Victoria cu ramdang in Vanlawng luh a ngah lo cun Melbourne zong lawlawse cu ngah rih lo.

Cucaah Australia autu (proposer) zong nih auhmi visa an laak cang ahcun a tu tein timhcia le ralrin cia a herh ngai ngai.

Siaherhnak he,

CRC Malaysia