Tikir Dam Ai Thok Ning

Tikir Dam hi thenkhat ruahnak ah Vice President Pu Henry Van Thio rian a tuan hnu lawngin tuanchuahmi ah kan ruah . A rak I thok ning tak cu mah tihin a si .

1998 Kum lio in Tikir khua Pawngah ummi “Tikir Kual “ timi hmun hi hmunhma rem, hmun ttha , hmun dawh a si caah hi lioah Pah Wa Tah (Ohkathah) a rak tuanmi ralbawi (Bo-Hmu-Ci) Tan Aung nih a ke bakin Ni li lamkal in a rak zoh hmasa ti si .

Hi lioah hin mawtaw lam zong a um rih lo . Cu hnu ah a mah a chawngmi, Pa Wa Tah (Oh-Ka-Tthah) a si vemi (Bo-Hmu-Ci) Tan Win nih a rak zoh i Tikir Kual (Tikir dam tuahnak hmun) hi ka hmuhmi hmunhma vialte lakah hmunhma dawh, hmunhma ttha bik a si tiah a rak chim ta ti si.

Hi lioah hin Tikir khua hi Thantlang Peng chungah pehtlaih nak lam le sul lei ah a rak chiat lio bik caan a si. Cozah lei zong nih hnu an rak chitmi khua a si. A ruang cu pehtlaihnak a chiat tuk caah si.

Tikir Dam tuah khawhnak ding ahcun zeihlan cem ah lam a pem hmasa a hau ti a si caah, 2003 kum ah (Nah-Tah-Lah) zung lei in Tikir le Hriangkhan khua hnih kar lam cawhnak ah tiin Kyat Sing (272 ) an rak thlak, nain cu zong cu an rak chuh than hna.

Cu lawng si lo, 2013 kum ah (Myat-Nu-Thu) Company nih Tikir le Hriangkhan kar lam cu alak (Free) in an rak cawhpiak than hna i, an lim hlan ah an ngol than hoi. Cu hnu cun Pu Henry Van Thio (Bohmu) Pensen a lak hnu, cozah sinah Tikir Dam tuahnak ding rak halnak ca a rak chiah.

Cu hnu ah Kawlram President zung in 2013 kum ah Tikir Kual (Dam) tuahnak a ttha maw ttha lo ti ngiatthlainak (Survey) tuah ding ca an rak chuah. Mah hnu cun USDP cozah kai hnu 2013-2014 Budget Kum ah Tikir Dam tuahnak ding caah tiin phaisa sing 2000 kyats an rak thlakpiak hna .

Cu zong cu Tikir Dam tuah loin Thantlang peng Lautu lei Khua (4 ) ah sing 2000 kyats cu lei tilam tuahnak ah tthenh phawt than an si . Dam tuahnak ah hman a si ti lo .

A liam cia caan zeimawzat ah Than Tlang peng ah pehtlaihnak lam le sul lei ahhin Mara Tlang le Bual Peng hi hawi hnu ai thlaimi, a chia bikmi pengtlang an rak si.

Kum 2015 , NLD Cozah a hung kai hnu in kanpa Pu Henry Van Thio nih a liam cia caan zeimawzat lio i Tikir Dam tuahnak dingah timhtuahmi vialte cu a thar in a van pehzulh than caah nihin ni ahcun hi DAM cu tlam a hung tling .

Tikir Dam tuahnak hmun cu hmunhma ttha/rem a si caah Japan ram in a rak tlungmi Mr. TERUMI TAKA OKA cu Tikir Dam le a pawngkam a zoh tikah hmailei thil a hmuh colh. Hi hmun hi hmailei caan ahcun ramchung ramleng khual an ngamnak hmun (Tourists Attraction) hmunnuam ah a cang te lai ti hi a hmuh colh.

Amah pumpak in Kawlram ah a um bal lomi thingkung Maple kung (3000) le Japan Cherry kung 1400 cu Japan ram bakin a rak phurh i amah bak nih a rak cinpi hna. Nihin ni ahcun duhnung ngai in an nung dih, zei tluk lunglawm awk dah a si.

Thantlang peng lakah Bual peng hi NLD cozah kai hlan a si ning ruah ahcun lungfak tuk a si.  Hawi hnu ah rak kaltakmi peng le tlang a rak si. Voi tampi cu tthanchonak lei nih kaltak a rak sinain Nihin ni ahcun hi dirhmun an phakmi hi Pathian thawng le thluachuah a si hrimhrim ti hi kan theih awk a si ko.

Tikir’ DAM kong ahhin bia vaivuan tampi a chuak tawn kan pa, Pu Henry Van Thio zong a si lo ning piin an tinak a um tawn. A ngaingai tiahcun Tikir Dam hi Tikir khua ca lawng a si lo. Bual peng ca lawng zong a si lo. Than Tlang peng kan dihlak ca a si. Chinram ca zong a si.

Nihin ni ah cu ruahnak cu kan hmuh khawh rih lo hmanhah a ra laimi caan ahcun kan hmuh te hrimhrim ding a si. Tikir DAM bantuk hmunhma rem, a tthami hmun a um si cun rak chuahpi cio uh. Hal khawh le tuah khawh i zuam hna usih.

Than Tlang peng Farawn khua zongah hmunhma an rak zoh nain a rem deuh lo an ti. Hmunhma dang a theimi le hmumi nih ruahnak zong rak chuah cio dingin kan sawmchih hna.

Kan Chinram, Thantlang peng chung, Bual peng um, Tikir khua hna i hi Tikir DAM pi a hung um khawhmi hi kan biak Pathian thawngin a si ti tu hin kan ruah deuh ding a si. Pathian thluachuah a si tiin ruah khawhtu hi a biapimi cu a si.

Catialtu: Pu Ram Khar